فــيــه حاجــة غــلــط ..
لما شاب مصرى يسيب بلده ويروح إسرائيل علشان ياخد جنسيتها ويسألوه عملت كده ليه ؟
يقولهم :
علشان أتعامل كبنى آدم فى مصر ..
يبقا فيه حاجة غلط
لما الدنيا تقوم فى بلد أوروبى علشان حبة تماثيل مشنوقة على شجرة وسألهم بتثوروا ليه ..؟
قالوا :
شنق التماثيل بيأذى مشاعرنا ..
يبقا فيه حاجة غلط
لما ميزانية الكلاب فى أمريكا تتجاوز ميزانية مصر ..
أكيد فيه حاجة غلط
لما فريق إنقاذ مدنى ينقذ قطة من حريق يَحصل على نوط الواجب وتقدير أهل البلد
يبقا فيه حاجة غلط
لما يقول فرعون أنا ربكم الأعلى والناس تستجيب وييجوا دلوقت بتوع الحزب الوطنى يقولوا :
إحنا القانون اللى نقوله يمشى على رقاب الكل
يبقا فيه حاجة غلط
لما مرشح لمجلس الشعب ينزل قرية زى قريتى ويكون من مغرياته البانجو و الحشيش
يبقا فيه حاجة غلط
لما شاب مصرى وهو بيكلمنى يقولى أنا متهيالى الحكومة مش لاقيه حد يشترينا
ولما أأقوله يعنى أيه ..؟
يقولى :
لو الحكومة لقت أى دولة تدفع فينا أى فلوس هتبيعنا ومش هناخد غير خمس السعر المتفق عليه بين الدولتين وبالعافية هنسافر .!
يبقا فيه حاجة غلط
لما يطلع أحمد عز ويقول للناس إن المحظورة عرفت قيمتها ويقلب الحقايق ويزور الإنتخابات علشان مش ضامن المكسب
يبقا فيه حاجة غلط
لما دكتور تأمين صحى يرمى ورق مريض مسن تعدى التمانين ويقوله ملكش علاج عندى علشان يا دوبك قاله والنبى يا إبنى مشينى بسرعة
يبقا فيه حاجة غلط
لما المساجين العرب فى السجون الأوروبية مش بيأكلوهم إلا أكل الكلاب
يبقا فيه حاجة غلط
لما شاب مسلم يقولى نار جهنم أحسن من حالنا فى بلدنا ..
وأسأله ليه بتقول كده ؟
يقولى :
على الأقل أنا عارف إن ربنا بيعاقبنى على شيئ عملته ..
لكن الحكومة بتعاقبنى على أيه ؟
يبقا فيه حاجة غلط
لما البوليس المصرى يحصل على المركز الأول فى إبتكار أدوات التعذيب
يبقا فيه حاجة غلط
لما تقارن بين نفسك كإنسان وغيرك الأوروبى كإنسان برضة والحسرة تاكل قلبك من الفرق الشاسع
يبقا فيه حاجة غلط
لما النهاردة أبقا أنا وبكرة أتغير وإمبارح كنت واحد تانى
يبقا فيه حاجة غلط
