كفاية يا جراح ::"""قصيدة لم أجربها ::""" ولكنها شدتني للشاعر أشرف توفيق

[thesniper_12007]

كفاية جراح

يا حبيبتي
!!قصدي يا اللي فهمت يوم إنك حبيبتي
عامله إيه؟
رغم إن الغدر ساكن حضن قلبك
لازم اطّمّن علِيهْ
قلبي صابُه البُعد لكن.. غصب عنّي
لسَّه داء الضعف فِيهْ
هوه ده القلب اللى سبتيه ويّا نارُه
هوّ دا القلب اللي كان بُعدك مرارُه
واللي تاه مشوارُه بَعدك.. وانطفى في الحلم ضَيُّه
واللى مش هتلاقى عمرك قلب زيُّه
قلب لمّا احتاج يفضفض بعد غدرك
"ما ابتداش بـ"ازّاي؟" و"ليه؟
!ابتدا الأول وقال لك: عامله إيه؟
******
قلب عارفاه من بدايتُه
فاتح الباب للّي فايتُه
قلب بانياه الجراح
بس مسكون بالبراح
يفتحُه لْكل الخلايق.. حتى لو منهم نهايتُه
حبي ليكي
كان طبيعه فْ قلبي مش إحساس جديد
حبي ليكي.. شيء لقيته ببصمتُه جوَّه الوريد
حب علّمتيني اصونُه
وعد صمّمناه بإيدنا..وْقلنا يبقى الصدق لونُه
عمري ما اتصوّرت قلبك يكسر الوعد اللي بينَّا
واللي صُنته فْ يوم يخونُه
كنت خايف -من بداية القصه- من آخر فصولها
هل هتبعدنا الظروف؟
هل هيفضل حبّنا مسجون بخوف؟
هل بعادنا يكون نصيبنا
ولاّ هيفضّل يسيبنا؟
....ولاّ... ولاّ
كل مشهد في النهايه.. ياما جرّبتُه ف خيالي
وْياما خُفتـُه
!إلاّ غدرك... عمري في الفهرس ما شفتـُه
خليتيني انْدَه على قلوب الخلايق
غصب عنّي.. وْمالتقيش
كله بيقول: "انسى نارها
"والسعاده الحلوه عِيشها.. وماتقاسيش
مش مهم القى السعاده
!!..الأهمَ ازاي اعيش
******
يا حبيبتي
!!قصدي يا اللي فهمت يوم إنك حبيبتي
كان زمان... كنت باتمنى اني اشوفك يوم في حِلمي
كنت افكّر فيكِ دايماً قبل نومي
كنت باخلع ويّا صورتك ليل همومي
كنت اشوفك كل يوم الصبح
لكن
جوّه ليل الوحده من غيرك.. بالاقي الكون مفيشْ
كنت باسأل صورتك الحلوهْ تِجيني.. مَابْتَجِيشْ
والنهارده.. بالتقي صورتك ليلاتي
جايّه مادّه الإيد بدمعك
!!عقلي يرفض.. بس يصرخ قلبي: هاتي
جايّه بالعذر المكرَّر
تشرحي.. واشتاق لك اكتر
وامسح الدمعه اللي نازله..وْضحكتي في الحلم تكبر
رغم إنك بعتي قلبي.. وْضاع خلاص مستقبله
!!بس عُذرك كنت دايماً باقبلُه
غصب عنّي..كنت بافرش رمشى تاني جوَّه حلمي
واحلم انّك يوم تعدِّي
واصْحى من نومي والاقي دمعتك
!!كات حارقه خدِّي
وامّا باصحَى.. كنت افكّر
لو هتيجي بجدّ.. إيه هيكون جوابي؟
هل هاثور وانصر كرامتي؟
ولاّ يبقى الردّ صمتي؟
ولاّ إيه؟
والحاجات الحلوه بينَّا.. بس هانساهُم بإيه؟
غنوتينك... اللي حبيتهم عشانك
شارع الشوق اللي ياما مشيته لاجل اوصل مكانك
اسمي ويَّا اسمِك على القلب اللي في النخله البعيدَه
فرحتك دايماً بِخَطـِّي.. وْساعة الإيد الجديده
والنهارده
عقلي مدّ الإيد في قلبي وطلّع النخله وقلَعها
حتى أحلامي اللي ضاعت.. بالخساره لغيري باعها
حتى ساعْة الإيد خلعها
!!وْبرضه باشتاق لك زياده
!ليه عملتي القلب راهب...وانتي مش قدّ العباده؟
خليتيني الصبح افكّر
خليتيني ف نومي افكّر
واوهم القلب اللي حبك إني هانسى
وْللأسف
!!!باشتاق لك اكتر
******
يا حبيبتي
!!قصدي يا اللي فْهمت يوم إنك حبيبتي
فاكره لمَّا كتير سألتي
ليه باقول كل الأسامي إلاّ إسمِك؟
كنت باسكت.. عارفه ليه؟
كنت حاسس إن إسمِك.. فوق ما يتحمِّل لساني
كنت حاسس إن إسمِك لو نطقته لوحدي
اكون إنسان أناني
وانتي عارفه.. إني مش إنسان أناني
كنت حاسس إن إسمِك مش حروف
كنت حاسس إنه درعي لو هتقتلني الظروف
اسمِك انتي بانطقه دلوقتي عادي
واحفظه دلوقتي عادي
زي أسماء اللي قبلك
واللي بعدك
!!واللي عاشقينِّي الساعادي
صدَّقيني
لو هتيجي فْ يوم لقلبي
مستحيل لو يتفتح
!!يبقى إيه شكل القصيده.. لو خيانتِك مُفتتَح؟
:كنتِ دايماً بتقولي لي
لو هتطلب منِّي حاجه.. قول
ماتطلبش السماح
والنهارده
جايّ باترجَّاكِ بسّ فْ كلمتين
يا حبيبتي
إنتي عارفه انِّك خدعتي
وانتي عارفه انِّك جرحتي
كفَّري عن ذنب قلبك
وابعدي عن قلبي حبِّك
..لو سمحتي
****

[نور الحرف]

ماهذه الرووووووووووعة
ماهذا الجمال
ماهذه الأحاسيس المليئة بالحب
ماهذا الشعر الذى خرج من أعماق القلب
لينفذ إلى أعماق أعماقه
إختيار موفق
سلمت ياإكرام

[thesniper_12007]

ماهذه الرووووووووووعة
ماهذا الجمال
ماهذه الأحاسيس المليئة بالحب
ماهذا الشعر الذى خرج من أعماق القلب
لينفذ إلى أعماق أعماقه
إختيار موفق
سلمت ياإكرام

اشكرك على مرورك الكريم وتعليقك الأروع أختي نور
هذه هو أشرف توفيق الذي كلما قرأت له أحسست بقشعريرة تنتاب جسدي مع كل كلمة بسيطة ومعبرة لانه يصيغها في إسلوب شاعر موهوب بكل معاني الكلمة شاعر تحسي ان اللغة العربية والعامية أداه طيعه في إيدة زي المايسترو اللي بإشارة من صوابعة يملك اقلوب
تقبلي تحياتي
ولك خالص ودي وتقديري واحترامي

[thesniper_12007]

كفايه جراح فين الردود

[thesniper_12007]

فعلا كفاية جراح

[اميره بلا وطن]

ياااااااااااه
رهيب الشاعر ده يااكرام
مش ده اللى كان كاتب قصيده حقك وحقى اللى انت كتبتها قبل كده؟
بصراحه شاعر يستاهل ان الواحد يقراله الف مره
لا مليوووووووون مره فى اليوم الواحد
بجد حلوه اوى
تسلم يااكرام

[thesniper_12007]

ياااااااااااه

رهيب الشاعر ده يااكرام
مش ده اللى كان كاتب قصيده حقك وحقى اللى انت كتبتها قبل كده؟
بصراحه شاعر يستاهل ان الواحد يقراله الف مره
لا مليوووووووون مره فى اليوم الواحد
بجد حلوه اوى
تسلم يااكرام

عارفه يا اميرة اشرف توفيق ده اسطورة بمعنى الكلمة ح تلاقي كل قصايده على اليوتيوب لأن الناس كانت بتعمل معاه زي ما كانت بتعمل مع أحمد سعيد تاخد القصيدة وتكتب اسمها عليها وخلاص القصيدة بقت بتاعته حتى القصيدة اللي حصل فيها مركز أول على الجمهورية واحد خدها وحصل بيها مركز أول (مرسال لحبيبتي ) بس اتفقست وصاحبنا أصبح في موقف لا يحسد عليه
اشرف توفيق ده اول شاعر قريت قصائده على النت وبالتالي اصبح عندي مكتبة للشعراء من حبي في كلمات هذا الشاب البارع
مش ح اطول عليكي
اقرأي لأشرف لأنه ممتاز
تقبلي تحياتي
لك خالص ودي وتقديري واحترامي

[اميره بلا وطن]

عارفه يا اميرة اشرف توفيق ده اسطورة بمعنى الكلمة ح تلاقي كل قصايده على اليوتيوب لأن الناس كانت بتعمل معاه زي ما كانت بتعمل مع أحمد سعيد تاخد القصيدة وتكتب اسمها عليها وخلاص القصيدة بقت بتاعته حتى القصيدة اللي حصل فيها مركز أول على الجمهورية واحد خدها وحصل بيها مركز أول (مرسال لحبيبتي ) بس اتفقست وصاحبنا أصبح في موقف لا يحسد عليه
اشرف توفيق ده اول شاعر قريت قصائده على النت وبالتالي اصبح عندي مكتبة للشعراء من حبي في كلمات هذا الشاب البارع
مش ح اطول عليكي
اقرأي لأشرف لأنه ممتاز
تقبلي تحياتي
لك خالص ودي وتقديري واحترامي

والله يااكرام القصيده اللى انت كتبتها فى موضوع من موضوعاتى (حقى وحقك)واللى قلتلى انها لهذا الشاعر العظيم
مش هتصدقنى لو قلتلك انى حفظاها
لانها بجد عجبتنى اووووووى
يعنى اعتبرتها دعوه للرومانسيه المفقوده
هحاول اقرأ له ان شاء الله

[دره]

والله بجد مش لاقيه رد
عارف كانى قاعده بتفرج على حدوته ومستسلمه تماما ليها
انا مش متخيله جمال كلام ذى ده
عارف بجد بقراها وانا حاسه باسترخاء
والله كانى مش فى عقلى كانى بحلم
مفيش رد يوصف جمالها
الله ربنا يكرمك يا اكرام على جمالها
اختيارك مميز انك جبتها هنا
ربنا يحميك

[thesniper_12007]

والله يااكرام القصيده اللى انت كتبتها فى موضوع من موضوعاتى (حقى وحقك)واللى قلتلى انها لهذا الشاعر العظيم
مش هتصدقنى لو قلتلك انى حفظاها
لانها بجد عجبتنى اووووووى
يعنى اعتبرتها دعوه للرومانسيه المفقوده
هحاول اقرأ له ان شاء الله

على فكرة له موضوعات هنا انا كاتبها اسمها
مرسال لحبيبتي
استحملي
إليها
وحشتيني
حتلاقي كل قصيدة جنبها أسمه يعني لو عملتي بحث على اشرف توفيق في المنتدى ح تلاقي حوالي 5 قصائد لأشرف وانا ان شاء الله باقي الحاجات احول انزلها
عارف القصيدة دي بالذات أنا لما باقرأها بحس بقمة الحب الموجود في الدنيا رغم حزن القصيدة وبحس بقمة الحزن لما الإنسان يكون بيحب ومش لاقي تقدير للحب ده
يعني زي ما قال مصطفى شعبان في فيلم أحلام عمرنا
إحنا بننجرح أوي لما بنحب أوي
دا طبعا بالإضافه إلى إنتقاء كلماته بعناية فائقة
تقبلي تحياتي
لك خالص ودي وتقديري واحترامي